Еден посен рецепт кој добро ќе им дојде на оние кои постат без масло. Се подготвува релативно брзо и добро ќе ви дојде во деновите на постот.
Иако мора да признаеме дека не е толку вкусен како традиционалниот, мрсен зелник, сепак е добра замена за оние кои постат.
Потребни состокји:
За тесто:
- 700 -800 гр. брашно
- малку квасец (половина коцка)
- млака вода по потреба, колку што прима брашното
За фил:
- главица-две кромид
- кечап
- печурки
- зачини (црн бибер, оригано)
Подготовка:
Од надојдениот квасец, брашното и млаката вода замесете меко тесно, додадете и малку сол. Оставете го тестото малку да одмори, па расукајте две кори малку поголеми од плехот во кој ќе печете.
Претходно подгответе го филот: исечканиот кромид динстајте го со малку вода додека омекне, додадете ги сечканите печурки, сол и зачини по вкус. Кога ќе се излади, додадете и малку кечап, за да добиете фил кој потсетува на пица. Ако сакате повеќе фил, ставете повеќе печурки и кечап.
Плехот набрашнете го, па ставете ја кората, истурете го филот и поклопете со втората кора која малку ќе ја наберете, направете витка и печете го на 200-220°Ц.
Кога ќе се испече, попрскајте го со малку вода и покријте го со крпа, малку да омекне.
Наша препорака: Филот може да го направите и од праз и суви коприви. Така што ситно ќе го насечете празот и ќе го издинстате. На крај само ќе ги додадете копривите и ќе ги динстате малку да омекнат.