Ви подготвивме рецепт за добро познатиот и лековит боров сируп од млади борови иглички. Се надеваме дека некому ќе помогнеме со овој природен сируп.
Идеален е за деца и возрасни, а помага при разни настинки, кашлица и отечено грло.
Потребни состојки:
- 400 гр. млади борови иглички
- 1 кг. кристален шеќер (или мед)
Подготовка:
Наберете млади борови иглички околу 400 грама. Берете ги само младите пупки кои имаат светлозелена боја. Измијте ги под студен млаз вода и наредете ги на кујнска крпа да се потсушат, најдобро преку цела ноќ.
Во голема стаклена тегла прво ставете ги боровите иглички, па наросете ги одозгора со шеќер. Ставете 1 килограм обичен кристален шеќер. Или може да ги редите на следниот начин ред иглички, ред шеќер се така додека ги потрошите игличките.
Потоа затворете ја херметички теглата и ставете ја на сончев прозор околу 40 дена со повремено протресување (да не се отвора).
За да го добиете лековитиот сируп потребни се 3 до 4 месеци, во зависност од тоа каде ќе ја чувате теглата. Постапката е побрза доколку таа е изложена на сонце.
Кога сонцето и природата ќе си го направат своето, вие ќе добиете готов производ без рок на траење.
После 40-45 дена сирупот процедете го низ густа газа, тогаш сирупот може да се консумира.
Се користи по потреба, по една супена лажица 2-3 пати дневно. Се употребува при кашлица и густ секрет. На деца се дава после навршување на 1 година и со консултација на лекар.
Совет плус: Наместо шеќер може да се стави мед.
За одржување: 1 лажица дневно, најдобро пред оброк или помеѓу оброци.
На здравје!