Ароматичното наутлија лепче традиционално се приготвува во југоисточните краеви на Македонија. Кога домаќинките го приготвуваат ова лепче, за празникот Мала Богородица, постои обичај да се раздава парче леб со грозје по роднините и соседите.
Состојки:
- 200 гр. наут
- 1,5 кг. брашно
- вода
- сол
Начин на приготвување:
Прво се приготвува квасот. Наутот се меле (може во машина за мелење ореви), се става во сад и се попарува со зовриена вода и сол.
Смесата се меша со дрвена лажица, се покрива садот и се остава да отстои цела вечер на топло. Наредниот ден квасот е готов.
Се зема половина килограм од брашното и му се додава квасот со малку вода. Се меша со лажица додека смесата да се соедини, се покрива и се остава 1 до 2 часа на топло да стаса.
Откако тестото ќе стаса му се додава уште 1 кг брашно, малку сол, вода по потреба и се меси. Тестото се става во плех и се остава да стаса уште половина час во загреана рерна на 50 степени.
Се пече на температура од 200 степени, околу 45 минути.