Пастрмајлијата е највкусна кога е испечена во фурна на дрва наместо во класичната печка меѓутоа ќе биде доста вкусна ако се подготви и во шпорет, доколку го имате вистинскиот рецепт.
Вкусната штипска пастрмајлија од македонската кујна, приготвте ја со добра музика и добро вино.
Состојки за тестото:
- 900 гр брашно
- 40 гр свеж квасец
- 1 лажичка сол
- 400-500мл вода
Состојки за внатрешност
- 800 гр свинско месо (или пилешко)
- 1 лажичка сол
- 1 лажичка црвен пипер
- 1 лажичка бибер
- 1 лажица масло
- 4 лажици свинска маст
Подготовка:
Најпрво се приготвува месото. Се сече на ситни коцки и се маринира во зачини со сол, бибер и црвен пипер. Се остава да преноќи за да се впијат сите зачини. Најдобро е месото да се приготви еден ден порано или најмалку шест часа да отстои зачинето со сол, бибер и црвен пипер.
Другиот ден се замесува тестото. Се подготвува класично со млака вода, сол, брашно и квасец. Откако ќе го замесите се остава да отстои и да се подигне, а потоа се размесува.
Од ова тесто излегуваат 3 пастрмајлии. Тестото се дели на 3 еднакви топки и се остава да одмори. Потоа на секоја се прави длабнатинка со прстите од средината на тестото кон нанадвор.
Секое парче тесто се размесува во елипсовидна форма и врз него во средина се реди приготвеното месо. Тестото се остава на тепсија која претходно е посипана со брашно. Врз секоја пастрмајлија се става и по една лажица свинска маст. Пропрскајте малку масло врз секоја пастрмајлија за да го добие сјаниот изглед.
Се пече во претходно загреана рерна најмалку на 250 ºC околу 35 минути, додека да зарумени. Потоа се вади тепсијата и се премачкуваат краевите-ивиците од пастрмајлијата со маст и пак се враќа да се допече уште 5 минути и се исклучува рерната.
Откако ќе се испечат пастрамајлиите се покриваат со фолија и платнена крпа и се остават 15мин.Послужете со лути феферончиња.
Добар апетит!
