Ова е еден стар рецепт за пача или пифтија, одлично мезе полно со месо и лук. Вистинските домаќинки мора да знаат како правилно се подготвува вкусна пифтија. Пробајте, нема да зажалите!
СОСТОЈКИ:
- 5 свински нозе (1,5 кг)
- 1 чадена свинска коленица (1кг)
- црн бибер (неколку зрна)
- 4 ловорови листови
- 1 главица лук
- сол по потреба
- мелен црвен пипер
- лута пипер
- вода
- магдонос (ситно сечкан)
- 3 моркови (варени)
- 5 јајца (верени)
НАЧИН НА ПОДГОТОВКА:
Свинските нозе добро исчистете ги, измијте ги и ставете ги во длабок лонец. Додајте сол, црн бибер и ловоров лист. Можете да додадете и неколку чешниња лук. Налијте вода околу 6-7 литри и гответе 4 часа на тивок оган, без додавање вода.
По 10-15 минути готвење отстранете ја пената. Затворете со капак и оставете ги да се готват. Пред крај посолете по желба.
Кога нозете ќе бидат зготвени и водата ќе зоврие извадете ги со решетка. Тргнете го лонецот од оган и оставете малку да се излади, па потоа со лажица внимателно отстранете ја вишокот мрснотија од површината. Водата прецедете ја од ситни коски, низ густа цедалка.
Месото внимателно се дели од коските, ситно се сечка и се реди на дното од некој подлабок сад во кој ќе стои пивтијата. А парченцата месо од свинската коленица, се сечкаат на мали парченца и се враќаат во лонецот.
Во лонецот со процедената вода, се додаваат 3-4 чешниња толчен лук и 3 лажички сол. Најдобро е да се проба, по вкус.
Јајцата и морковот се варат и потоа се сечат на мали тркалца. Магдоносот се сецка ситно пред редење на пифтијата.
Во длабок сад во кој ќе стои пифтијата прво се редат тркалцата од јајцата, морковот и сецканиот магдонос. Се додава малку толчен лук и врз него се распоредуваат исечканите парченца од месото. Се наросува со ситно сечкан лук. Сето тоа се прелева со прецедената течност во која се вареле, убаво се распоредува преку месото и лукот.
Вака подготвената пивтија се остава на студено преку ноќ да стегне. Потоа се прелива во садови за сервирње и се остава во фрижидер добро да се излади и да се соедини.
Пред послужување може да се нароси одозгора со толчена лута пиперка.
Добар апетит!