Време е малку да ја “подобриме” техниката на сликање во кромид. Ако сте приврзаник на природните методи на сликање велигденски јајца без хемикалии и повеќе го сакате стариот начин на сликање во кромид, мермерните јајца сигурно ќе ве воодушеват!
Потребни ви се:
- лушпи од кромид
- малку чиста бела хартија
- една вреќичка со зелена боја на јајца
- стари хулахопки што ќе ги исечете на големината малку поголема од јајцето.
Подготовка:
Исечете ги лушпите од кромид на мали парчиња, исечете малку бела хартија во тесни ленти, а потоа во мали триаголници. Потопете го секое јајце во вода, па превртете го во мешавина од лушпи и хартија, за да налепи насекаде. Ставете неколку лушпи на чорапот, па завиткајте го јајцето и врзете со ластик.
Ставете ги завитканите јајца во шерпа со ладна вода, лажица оцет и лажица сол, истурете ја содржината на една вреќа со зелена боја и варете на вообичаен начин.
Извадете ги јајцата, и кога ќе се оладат малку, исечете го чорапот и извадете ги лушпите и хартијата. Ќе бидете воодушевени од резултатот! За висок сјај, премачкајте ги јајцата со памучна вата натопена во малку масло.