Интересен предлог за новогодишни мали грицки во вид на солени и слатки Снешко и пингвин.
Полека започнува еуфоријата околу празниците. Сите со нетрпение го очекуваат украсувањето на елката, новогодишната трпеза на која ќе најдете свинско печење и задолжителната руска салата, како и мали колачи. Но, сите со нетрпение го очекуваат и мезето.
Оваа година покажете колку сте креативни и израдувајте ги најблиските, но и пријателите доколку дојдат на вечера. Подгответе мезе во форма на Снешко и пингвин. Потребни ви се варени јајца, маслинки и моркови. Пингвинот е солено предјадење, додека Снешко може да се направи во солена или слатка варијанта.
Овие мали закуски можете да ги направите заедно со децата и да уживате во новогодишната магија.
Состојки за Снешко:
- 2 варени јајца
- 1 маслинка
- малку морков
- магдонос
Подготовка:
Сварете ги јајцата, излупете и потоа поврзете ги со чепкалка за заби. Сега земете сламка и направете 3 дупки на долниот дел од јајцето, една под друга. А на горното јајце направете 2 дупчиња, една до друга. Земете ја маслинката, исечете ја на работна површина и со сламка извлечете ги парчињата.
Ставете како копчиња и очи во сите дупки. Ставете го магдоносот од двете страни како раце. Морковот исечкајте го на прстени, па ставете 3 прстени еден врз друг како капа, а потоа исечете триаголник и ставете го како нос.
Состојки за Пингвин:
- 2 маслинки
- топка сирење
- 1 морков
Подготовка:
Исечете една маслинка, но не до крај. Во отворот ставете топче сирење. Одозгора ставете цела маслинка па соединете ги со чепкалка за заби, потоа горната маслинка свртете ја така што шуплината е напред.
Во шуплината ставете триаголник од морков, а на дното на маслинката со сирење залепете прстен од моркови со исечен триаголник за да бидат како нозе.
Пријатно!
