Иако некогаш Велигденските јајца се вапцале исклучиво со лушпи од кромид, со тек на времето домаќинките ја развивале својата креативност и испробувале многу техники, од преубавото шарање со најразновидни тревки, па се до боење со бои за колачи и вапцање со свила.
Во последно време се распространи најновиот хит за вапцање јајца со помош на пена за бричење.
Оваа техника нуди можност да се добијат вапцани шарени јајца во повеќе нијанси, која во рекорден број ја прегледале повеќе од 2 милиони луѓе!
Доколку сте загрижени поради хемикалиите во пената за бричење, истиот трик може да го употребите и со шлаг пена или слатка павлака.
Се што ви е потребно за вапцање според оваа техника е следно.
Состојки:
- пена за бричење или шлаг пена,
- разнобојни бои за колачиња,
- јајца со бела лушпа (задолжително бели)
Од помошен прибор потребно ви е една чинија, кујнска хартија за бришење, две лажички и дрвени стапчиња (или чепкалки).
Начин на подготовка:
Ставете ги јајцата да се сварат. Откако ќе се сварат вапцајте ги додека се топли.
Во чинијата (која подоцна ќе ја фрлите) ставете малку изматен шлаг, слатка павлака или пена за бричење, па додадете неколку капки од омилените бои.
Полека и внимателно размешајте ги боите со стапче, да добиете убаво разлиени шари слични на мермер.
Опфатете го јајцето со две лажички (или со рака) и полека потопете го во пената со бои, така да се преслика шарата на самото јајце.
Потоа извадете го и оставете на хартија да се олади најмалку 30 минути, за добро да се исуши пената. Истата постапка повторувајте ја со останатите јајца.
Кога потполно ќе бидат суви јајцата, со помош на кујнска хартија полека и нежно отстранете го остатокот од пена или шлаг, но внимателно и без триење.
Едноставно и креативно!
Резултатите ќе ве одушеват, бидејќи ќе ги добиете најубавите шарени Велигденски јајца кои некогаш сте ги виделе.
Во прилог погледнете ја целата постапка во видеото:
