Школки со сирење и магдонос.
Состојки:
Тесто:
- ½ кг брашно
- 1 лажичка прашок за пециво
- 1 лажичка сол
- 200 мл кисело млеко
- 150 мл масло
- 1 јајце
Полнење:
- 120 гр фета сирење
- ½ грст од магдонос
- 1 белка од јајце
За премачкување:
- 1 жолчка од јајце
- Сусам
Подготовка:
Искршете го сирењето, исечкајте го магдоносот и измешајте го со сирењето. Лесно изматете ја белката, а потоа додадете во сирењето и магдоносот, со цел да се поврзат и да не станат премногу течни. Ставете ги на страна.
Измешајте брашно, прашок за пециво и сол, додадете кисело млеко, масло и едно изматено јајце. Замесете мазно тесто. Тестото развлечете го на набрашнета подлога до дебелина од 1/2 см. Исечете кругови со дијаметар од 10 см. Ставете лажичка од филот на едната половина од кругот, преклопете го кругот за да направите школка, а потоа притиснете ги рабовите со вилушка, да се залепат.
Подготвените школки распоредете ги на плех обложен со хартија за печење. Секоја школка премачкајте ја со изматена жолчка од јајце и посипете со семе од сусам. Печете во загреана рерна на 180 степени 20 минути.
Добар апетит!
