Пробајте го рецептот за оваа фантастична чоколадна торта.
Никогаш нема доволно рецепти за чоколадни задоволства. Без разлика дали сакате да се засладите после ручекот или да подготвите задоволство за роденден или прослава, чоколадите се секогаш добар избор. Сите ги сакаат, и изгледаат прекрасно. Овој десерт, чиј рецепт можете да го прочитате подолу, има две меки кори, кремаст фил измеѓу и се е прелиено со глазура. Ќе ви се допадне на прв залак.
Состојки:
Кора:
- 200 гр путер
- 1 шолја шеќер во прав
- 2 јајца
- 100 гр стопено темно чоколадо
- 260 гр брашно
- 35 гр какао
- 2 лажици прашок за пециво
- 1,5 чаши млеко
Фил:
- 330 мл слатка павлака
- 250 гр маскарпоне
- 200 гр растопено млечно чоколадо
Глазура:
- 50 мл слатка павлака
- 100 гр млечна чоколада
Подготовка:
Најпрвин измешајте го омекнатиот путер со шеќерот во прав додека не стане мазна и убаво изматена смесата. Додадете ги јајцата едно по едно со постојано мешање. Во смесата додадете ја изладената стопена чоколада и замесете тесто.
На крајот наизменично се додаваат млекото и просеаните суви состојки. Тестото се меша само со лажица додека не се соединат состојките. Пото тестото истурете го во плех обложен со хартија и ставете го во загреана рерна на 170°C околу 40 минути.
За подготовка на филот слатката павлака се мати додека не се стегне. Додадете маскарпоне сирење и изматете кратко. На крајот прелијте го во смесата изладеното, но сепак течно чоколадо и повторно кратко изматете го филот.
Испечената кора поделете ја на два дела. На дното од калапот ставете една кора и намачкајте го филот врз неа. Врз филот ставете го вториот дел од кората и лесно притиснете. Тортата ставете ја во фрижидер неколку часа.
Пред сервирање украсете со чоколадна глазура, која ќе ја подготвите така што малку ќе ја загреете слатката павлака и во неа ќе го стопите чоколадото.
Пријатно!
