Отсега ќе го правите цело време.
Состојки за тестото:
- 300 гр мазно брашно
- 150 гр омекнат путер на собна температура
- 80 гр шеќер
- прстофат сол
- на врвот на ножот прашок за пециво
- 1 ванилин шеќер
- 1 јајце
За кремот:
- 1/2 л млеко
- 2 чоколадни пудинга
- 70 гр чоколадо за готвење
- 140 гр шеќер
- 80 гр путер
- 100 гр сечкани лешници
За декорација:
- 30 гр чоколадо за готвење
- 2 лажици млеко
- 2 лажици масло
Подготовка:
Во поголем сад истурете брашно, исечете путер, додадете шеќер, јајце, сол, прашок за пециво и ванилин шеќер. Од сите состојки со рака замесете мазно тесто. Тестото префрлете го во проѕирна фолија, добро завиткајте го од сите страни и истиснете го воздухот. Оставете го тестото да отстои во фрижидер еден час.
По околу половина час треба да се направи кремот. Измешајте чоколаден пудинг со шеќер и земете 12 лажици млеко и измешајте да нема грутчиња. Остатокот од млекото ставете го да зоврие. Кога млекото ќе зоврие, тргнете го на страна, во него сипете ја смесата со пудинг, промешајте, вратете на оган и варете додека смесата не се згусне. Во сварениот пудинг додадете рендано чоколадо и убаво измешајте да се растопи чоколадото и да се соедини со кремот.
Потоа додадете го путерот исечкан на коцки и соединете со кремот. Покријте го кремот со фолија и оставете малку да се излади.
По еден час извадете го тестото од фрижидер и измерете го. Одделете една третина од тестото и чувајте го за подоцна. На набрашнета површина развлечете го поголемиот дел од тестото до димензиите на плехот за печење.
Намастете го плехот за печење и посипете го со брашно, па ставете го роланото тесто во него. Ако некаде остане вишок тесто, исечете го со нож. Соединете го вишокот тесто со неискористениот дел.
Отстранете ја фолијата од кремот, нанесете ја преку тестото и добро израмнете ја, внимавајќи на рабовите. Потоа врз целиот крем ставете половина од сечканите лешници, а остатокот од тестото изрендајте го и со прстите прераспределете го по целата површина. На крај, одозгора посипете го остатокот од лешниците.
Питата се пече во загреана рерна на 180 степени 40 минути. Се лади на собна температура, па се украсува со растопено чоколадо измешано со млеко и масло. После тоа, добро изладете го во фрижидер пред да го исечете и послужите.
Уживајте!
