Не познаваме некој што не сака топки од Фереро Рошер. Реално, кој може да најде маана во чоколадниот крем во комбинација со печени лешници. Вкусно!
Состојки:
- 200-250 гр печени лешници
- 200 гр крем чоколаден, по ваш избор (нутела, црн дел од еурокрем, итн.)
- 200 гр наполитанки од лешник
- 200 гр чоколадо
- 100 гр маргарин
Подготовка:
Одделете околу 45-50 лешници. Преостанатите лешници исецкајте ги ситно. Исто така, смелете ги наполитанките на мали парчиња. Малку, бидејќи парчињата треба да останат, не треба да бидат многу мелени. Кремот треба да отстои на собна температура, за полесно да се меша.
Одделете околу 50 грама сецкани лешници, а остатокот измешајте го со кремот и наполитанките. Земете од смесата и земете еден лешник и направете топче околу лешникот од самата смеса. Повторувајте се додека не се потроши полнењето. Ставете во фрижидер да се стегнат.
За глазурата, стопете го чоколадото со маргарин на пареа и на крај додадете ги тие 50 гр сецкани лешници. Истурете ја оваа глазура од сите страни на секоја топка. Ако не сакате топчињата да имаат „стапало“ од чоколадото кое ќе се исцеди од нив, ставете го секое топче на чепкалка за заби и кога ќе го полиете со чоколадата боцнете го на едно парче стиропор. Се што треба да направите следно е да почекате да се стегне глазурата и тоа е тоа.
Уживајте!