Велигден се приближува и размислуваме за сите начини на кои можеме да фарбаме јајца. Традиционалното фарбање јајца вклучува употреба на лушпи од кромид кои ја прават бојата посилна и поубава.
Состојки:
- јајца, количина колку што ви е потребно
- лушпи од кромид околу пола ќеса
- стари најлонски чорапи, хулахопки
- разни лисја и цвеќиња: детелина,глуварче, ајдучка трева итн, се што ќе најдете да има убава форма
- поголемо тенџере
- малку масло и памук – за да ги премачкате јајцата по готвењето
Подготовка:
Прво треба да ставите по едно или две лисја или цвеќиња на секое јајце, за да се уверите дека така ви одговараат. Поставете го листот или цветот по желба.
После тоа, исечете ги хулахопките на парчиња двојно подолго од должината на јајцето и на средина. Ставете го чорапот над јајцето на делот каде што е поставен листот или цветот. Добро затегнете го чорапот, држејќи го листот за да не се поместува. Потоа врзете го во јазол или завиткајте ги краевите со еластична лента, ластик.
Кога ќе ги подготвите сите јајца што сте ги намениле за сликање, оставете ги настрана и подгответе го тенџерето.
Во поголемо тенџере ставете лушпи од кромид. Потоа ставете ги јајцата на нив. Истурете вода врз сето тоа и ставете на шпоретот да се готват. Кога водата ќе зоврие, варете ги јајцата во кромидот околу 10 минути. Внимавајте да не ги преварите премногу.
Кога јајцата ќе се сварат, извадете ги од тенџерето и прелијте ги со ладна вода. Потоа отстранете ја хулахопката и украсниот лист. Ќе видите како добивте уникатен украсен отпечаток на велигденските јајца. Премачкајте ги велигденските јајца со памук со малку масло за да добиете висок сјај.
