Ова е едно од омилените македонски традиционални мезиња, кое секогаш е добредојдено да го има на маса.
Неодоливо вкусно во комбинација од пинџур намачкан врз топло или потпечено лепче со сирење. Нема ништо подобро од ова.
Потребни состојки:
- 2 кг зелени пиперки
- 1 кг домати
- 1 модар патлиџан (поголем)
- 3-4 чешниња лук
- масло за готвење
- малку сол
Подготовка:
Пиперките се печат, се ставаат во пластична кеса и откако малку ќе се оладат се лупат и им се вадат семките. Во кесата тие се задушуваат и полесно се лупат.
Доколку одберете темно зелени пиперки тогаш пинџурот ќе биде малку потемен.
Доматите се попаруваат со врела вода, се оставаат 2-3 минути да постојат во водата и пото лесно се лупат. Се сечкаат на не многу ситни парчиња, се сместуваат во тенџере, се ставаат на оган и се пржат додека течноста скоро исчезне но не смее да се со дозволи да се испари целата течност
Модриот патлиџан се пече на силен оган и се сече на парчиња.
Излупените пиперки, испрчениот домат и испечениот црн патлиџан се ставаат во блендер и се блендираат додека се иситни целата смеса, но не смее таа да изгледа како каша, треба да се забележуваат мали парчиња од пиперките.
Со вака добиената смеса може да се постапи на два начина:
- Еден дел може да се смести во соодветен сад и да се смрзне, за зима или рана пролет, или кога ќе биде потребен.
- Може да се спреми за јадење. Во тој дел се додава изгмечен лук, сол и масло според вкусот. Маслото може да се загрее, но и не мора (вака е поздраво). Добро се меша со дрвена лажица и уште така топол може да се консумира.
Совет плус: Доколку сте љубител на лут пинџур, тогаш може да се испече и некоја лута пиперка или едноставно на крај да се додаде лут буковец.
Добар апетит!