Изненадете го семејството со еден ваков ручек пригответе мазник со тегнати кори. Ви подготвивме рецепт за традиционален македонски мазник со тегнати кори… нешто превкусно!
Состојки:
- 1 кг брашно
- 1 лажичка сол
- 500 мл млака вода
- 100 мл зејтин
Подготовка:
Сите состојки се мешаат во сад се месат се додека не добиете убаво меко тесто. Се покрива садот со крпа и се остава тестото да одмори околу 20 минути.
Поделете го тестото на 6 еднакви делови. Од секој дел направете топче и премачкајте го со малку зејтин. Кога ќе завршите се покриваат топчињата со стреч фолија и се оставаат да одморат 10 минути.
Потоа секое топче се расукува колку една чинија и пак се премачкува со зејтин од двете страни. Расукајте ги така сите топчиња и наредете ги една врз друга со стреч фолија помеѓу нив. Вака наредени расуканите кори оставете ги да одморат околу 20 минути.
На масата се простира еден чаршав. Се зема една расукана кора и се става на работната маса, ставете масло на рацете и со намрсени раце полека тегнете ја кората. Кога ќе ја растегнете кората пресечете ги краевите со ноже.
Кората се прска со малку масло или со стопен маргарин, се филува по ваша желба и со помош на чаршавот се собира кората како ролна. Ролната се витка како полжав и се става во премачкан сад за печење. Постапката е иста и со останатите кори.
Откако ќе го наредите мазникот, се попрскува со малку масло и се става во рерна да се пече на 220 степени Целзиусови околу 25 минути, додека не добие убава румена боја.
Ако сакате мазникот да биде помек, пред да го извадите од рерна премачкајте го малку вода и неутрална павлака и оставете го уште некоја минута во рерна.
Потоа извадете го и покријте го со малку влажна крпа или може да го премачкате само со малку ладна вода и да оставите да се излади.
