И вкусна и украсна торта.
Прекрасно уживање со благ вкус на боровинки, мек бисквит и уште еден лесен крем. Наместо боровинки, можете да користите било какви бобинки.
Состојки:
- 250 гр боровинки (или кое било црвено овошје)
- 4 лажици шеќер
- 50 + 50 мл вода
- 30 гр скроб/густин/нишесте
Кора:
- 4 јајца
- 4 лажици шеќер
- 4 лажици масло
- 4 лажици брашно
Фил :
- 100 гр путер
- 100 гр шеќер во прав
- 250 гр млечен намаз (да не е солен и кисел), може и маскарпоне сирење
- 100 мл слатка павлака (павлака за шлаг)
- 10 гр бурбон ванилин шеќер
Подготовка:
Во боровинките додадете шеќер и 50 мл вода и ставете на оган да се варат. Гответе минута или две. Густинот и преостанатите 50 мл вода измешајте ги и варете ги во боровинките. Брзо измешајте и тргнете го од оган. Брзо се згуснува. Оставете да се излади.
Вклучете ја рерната да се загрее на 200 степени. Жолчките се матат со 2 лажици шеќер, се додава маслото, па брашното и се се меша. Посебно изматете ги белките со преостанатите 2 лажици шеќер.
Во смесата со жолчките додавајте ги белките по малку и измешајте со шпатула. Отпрвин се е доста тврдо, па како што ја додавате белката постепено омекнува. Истурете во обложен плех 40 x 30 cm и печете 10 минути. Печената кора се вади од рерна, се лади 5 минути, па се трга од плехот и се трга хартијата.
Омекнатиот путер се мати со шеќерот во прав, се додава млечниот намаз, се мати, па се додава павлаката и се повторно се мати. На крајот додадете ванилин шеќер и измешајте сè.
Целото желе од боровинки нанесете го на кората и размачкајте го, но не докрај до левиот и десниот раб бидејќи ќе ги исечете рабовите. Врз желето од боровинки нанесете го и белиот фил, и оставете малку од филот за декорација. Исечете по 2 см од горната и долната страна на кората и тргнете ги тие ленти.
Сега измерете по 5 см. и исечете ја целата кора на ленти. Ќе добиете 7 ленти. На крајот ни остануваат 2 см кои исто така ги отстрануваме. Ако одговара на 8 ленти од по 5 см, пресечете го така.
Првата лента ја вртите во ролат, но не притискате силно. Веднаш ставете ја на плех. Останатите ленти обвиткајте ги околу првиот ролат, продолжувајќи една по друга. Кога ќе завршите, остатокот од филот нанесете го одозгора, по желба декорацијата ја оставаме на вас на крајот. Добро изладете и послужете.
Пријатно!
