Сочните телешки шницли во сос од зеленчук се одличен избор за ручек.
Љубителите на месо ќе бидат особено воодушевени од овој рецепт за телешки шницли во сос од зеленчук. Телешкото месо е особено здраво, а она што го издвојува од другото црвено месо е тоа што содржи најмалку калории.
Подготовката е многу едноставна, а нема потреба од многу садови, бидејќи се се прави во една тава. Послужете со свежа сезонска салата.
Состојки:
- 4 телешки стекови
- 1 црвена пиперка
- 1 зелена пиперка
- 1 главица кромид
- 2 моркови
- 200 мл сок од домати
- 2 лажици брашно
- коцка путер
- сол, бибер
Подготовка:
Телешките шницли добро исчукајте ги со чекан за месо, посолете и побиберете ги, па извалкајте ги во брашно. Во тавчето ставете коцка путер, а кога ќе се растопи испржете ги шницлите. Кога ќе се испржат, извадете ги и оставете ги на страна.
Зеленчукот исечкајте го на коцки, па во истата тава прво пропржете го кромидот додека не стане проѕирен, па додајте го другиот зеленчук. Се динста додека не омекне, а потоа се прелива со сокот од домати.
Додадете билки по вкус, а кога ќе зоврие, вратете ги шницлите. Намалете ја топлината, покријте ја тавата и динстајте сè заедно уште 15 минути додека месото целосно да омекне.
Пријатно!
