Името сутлијач (или сутлијаш) потекнува од турскиот збор sütlaş = sütlü aş, што во превод значи “млечна храна”.
Сутлијачот е застапен скоро насекаде во светот. Овој десерт се појавува во повеќе варијации во поглед на густината и аромата што се додава, а основните состојки секогаш се млеко и ориз.
Состојки:
- 1 шолја ориз (180гр)
- 1 литар млеко (топло)
- 2 шолји вода
- 3 лажици шеќер (60гр), или повеќе по желба
- кора од лимон
- цимет
Начин на подготовка:
Оризот се става во вода потопен да одстои 30 минути. Потоа во сад со дупло дно се вари исцедениот ориз со 2 шолји вода, на оган со средна температура. Се вари додека да ја абсорбира водата, околу 10 минути.
Потоа се додава млекото шолја по шолја, се намалува температурата и се вари со лесно мешање. Варењето трае околу 15 до 20 минути или додека се добие саканата густина.
Две до три минути пред крај се додава шеќерот и се меша. Сутлијачот при крајот на варењето е сеуште течен.
Кората од лимон ја рендаме и ја додаваме кога варењето е завршено и лесно се меша. Сутлијачот при ладењето испарува и се продолжува да се згуснува.
Додека е уште топол го излеваме сутлијачот во припремени шоли или тањирчиња.
Секоја порција ја декорираме со поросување мелен цимет и ги оставаме да се изладат.
Се добиваат 8 сервирања од 200 мл.
На здравје!
ЗАБЕЛЕШКА: Со потопување на оризот почнува и процесот на готвење. Со овој процес се потпомага намалувањето на фитичната киселина во оризот. Познато е дека фитичната киселина го попречува искористувањето на минералите од храната. Со искиснувањето на оризот се подобрува достапноста на минералите од оризот и другите хранливе состојки што се варат заедно во случајов млекото. Воедно оризовите зрна се воздушести и времето на готвење е намалено.