Тараната е тестенина која домаќинките многу често ја употребувале во минатото и со неа подготвувале разни комбинации на јадења: манџи, чорби, печени специјалитети.
Во гостиварско, доста популарен бил рецептот за росник, јадење чија основна состојка е домашната тарана. Да се потсетиме како нашите баби го правеле овој старински деликатес.
Состојки:
- 500 гр.тарана
- 100 гр. пченкарно брашно
- 1,5 л. вода
- 200 гр.сирење
- сол по желба,
- масло по потреба.
Подготовка:
Водата се става да зоврие. Се додава 3-4 лажици масло и сол по потреба. Потоа во зовриената ставете ја тараната да се подвари, околу 5 до 7 минути.
Убаво се меша три-четири минути, а потоа постепено се додава пченкарното брашно и при тоа постојано мешајте за да не се создадат големи грутки. Варете на тивок оган, се додека не се впие целото количество на вода.
Откако ќе се впие целата вода смесата истурете ја во плех и ставете да се пече во рерна околу 30-40 минути. Печете во загреана рерна на 200 степени и од време на време промешувајте го росникот со дрвена лажица.
Росникот е убаво направен кога зрната од тарана се двојат.
Откако ќе се испече росникот, попарете го со малку загреано масло. Маслото се загрева во посебно лонче до вриење и се попарува росникот, па убаво се меша. Раздробете го сирењето и одозгора поросете го росникот, потоа може да го измешате. Вака подготвен росникот на гостиварски начин е спремен за јадење.
СОВЕТ ПЛУС: За печење на росникот користете постара тепсија баш поради тоа одлепување-стружење на зафатената кора. На дното од тепсијата и на краевите ќе се зафати коричка и откако ќе се извади од рерна со нож се одлепува коричката. Ова е неопходно затоа што се добива на вкус и росникот ќе биде покрцкав.
Добар апетит!
Извор: gostivarpress.mk