Украсете ја масата со овој необичен ролат со афион и сирење. Користете афион на малку поинаков начин – во солена верзија.
Состојки:
Кора:
- 8 белки
- 1 лажичка сол
- 5 лажици брашно
- 2 лажици афион
- 1/2 вреќа прашок за пециво
Фил:
- 200 гр крем сирење
- малку шунка или некоја друга салама или виршла
- краставици
Подготовка:
Ставете сол во белките и изматете ги во цврста пена. Додадете ги другите состојки и лесно промешајте. Истурете ја масата на хартија за печење (задолжително), во плех со димензии 25 × 38 см и печете на 180 степени Целзиусови само неколку минути додека малку порумени. Внимавајте да не го препечете, треба да остане скоро целосно бел.
Веднаш, додека е се уште жешко, пренесете ја испечената кора заедно со хартијата за печење на кујнска крпа, а потоа извадете ја хартијата од кората.
Изладете ја кората и премачкајте ја со сирењето во кое сте измешале рендана салама. Саламата можете и да ја исечете тенко и да ја распоредите на сирењето, што е можеби повеќе декоративно. Можете исто така да додадете краставици.
Потоа убаво, со помал притисок, завиткајте ја исполнетата кора во ролна.
Пријатно!
