Сите сакаат слатки, а дали некогаш сте пробале солена ванилица?
Ванилицата за многумина беше омилено уживање во детството. За многумина тие се првата асоцијација за бабината кујна, а дали некогаш сте пробале солени? Постапката за подготовка е иста, а можете да си поиграте и со вкусовите и да изберете зачини. Тие се одлично решение за предјадење на празнична маса, бидејќи гостите сигурно ќе се воодушеват, а можат да бидат и лесна закуска.
Состојки:
- 250 гр брашно
- 100 гр путер
- 100 гр рендано сирење
- 100 гр сечкани кикирики
- 3 лажици кисела павлака
- 1 лажичка сол
- 1 лажичка прашок за пециво
- 250 гр крем сирење
- магдонос
- оригано
Подготовка:
Во сад се ставаат брашното, солта, прашокот за пециво, сирењето, путерот, павлаката и кикириките, па со рака се замесува тесто. Кога ќе добиете хомогена смеса, завиткајте ја во фолија и оставете ја половина час во фрижидер.
После тоа со сукало расукајте го тестото, па со калап или чаша за ракија извадете ги ванилиците и наредете ги на плех обложен со хартија за печење. Печете во загреана рерна на 180 C околу 15-20 минути додека не поруменат.
Оставете ги да се изладат, додека го подготвувате филот. Во крем сирењето додадете ситно сечкан магдонос и оригано, а можете да додадете и други зачини по вкус. Едната страна од ванилата премачкајте ја со сирење, па соединете ја со другата. Постапката повторете ја додека не го потрошите целиот материјал.
Пријатно!