Мек и воздушен, ќе ги освои сите ваши сетила.
Гозлемето е нешто помеѓу палачинки и пица, а многумина велат дека тоа е на некој начин турски леб. Како и да ги наречете, едно е сигурно, на крцкавиот изглед и вкусниот фил речиси никој не може да одолее. Гозлемето може да се подготви со мелено месо, компири…, а Турците најчесто го подготвуваат со сирење и спанаќ.
Затоа, ви пренесуваме рецепт за ѓозлеме чија комбинација на вкусови ќе ги освои сите ваши сетила.
Состојки за тесто:
- 500 гр брашно
- 1 кесичка квасец
- 1 лажичка шеќер
- 1 лажичка сол
- 3 лажички масло
- 300 мл млака вода
Состојки за филот:
- 300 гр спанаќ
- 1 страк праз
- 300 гр иситнето сирење
- 2 лажици масло
- 1 лажичка сол
- зачин по вкус
- 1 лажичка лук во прав
Подготовка:
Квасецот и шеќерот измешајте ги со малку топла вода и оставете 10 минути да се активира квасецот. Во длабок сад измешајте ги брашното, солта, маслото, водата, па додадете го квасецот и замесете мазно тесто. Оставете 15 минути тестото да нарасне.
На работната површина посипете малку брашно, па тестото поделете го на шест кори. Покријте ги и оставете ги да отстојат еден час. Во меѓувреме, подгответе го филот.
Спанаќот избланширајте го во поголема количина вода во која ќе посолете, па процедете го. Празот ситно исечкајте го, па измешајте го со спанаќот, сирењето и додадете лук и зачини по вкус.
Ставете ги корите една по една на работната површина и расукајте ги во што потенок круг. Поставете го филот во средината на кругот и рамномерно распоредете го. Преклопете го тестото од сите четири страни.
На средно загреана тава истурете малку масло, па врз него пржете ги лепчињата пет минути од едната, па пет минути од другата страна. Гозлемето послужете го топло.
Пријатно!