Доколку сакате да внесете новитети во вашето дневно мени и да внесете нешто вкусно и посебно на трпезата, овој оброк е вистинскиот избор.
Доколку сакате да му угодите на вашето семејство со нешто посебно за ручек или ви доаѓаат гости, а ви треба оброк за да ги импресионирате, рецептот за свинско филе во лиснато тесто е совршен избор.
Ова јадење изгледа елегантно, незаборавен вкус дава мекото парче свинско месо, премачкано со ваква панцета или листови сланина по избор, сето тоа завиткано во лиснато тесто. Со сезонска салата и прилог од задушен зеленчук во путер, ќе биде вистински деликатес кој ќе ги воодушеви сите кои имаат можност да го пробаат.
Состојки:
- 700 гр свинско филе
- 150 гр сланина во листови
- 250 гр лиснато
- сол
- бибер
- зачини
- јајце за премачкување
- 2 мали коцки путер
Подготовка:
Замрзнатото лиснато тесто извадете го од фрижидер и оставете го да отстои 15 минути на собна температура. За тоа време посолете го месото ставете бибер и посипете со малку сув зачин.
На малку загреан путер во тава пропржете го кратко од двете страни. Извадете го на салфетка да се исцеди, па целото завиткајте го во кришки сланина.
На набрашнета површина со сукало развлечете го тестото во правоаголна форма да биде приближно два милиметри и врз него ставете го филето обложено со сланина. Тестото завиткајте го околу филето за да има форма на ролат, па расукајте го на страна.
Загрејте ја рерната на 200 степени. Во тава намачкана со путер ставете го филето и по површината намачкајте го јајцето, а ако сакате тестото да го издлабите за да има интересни шари, лесно исечете го со нож на неколку места, но само на површината.
Ставете ја тавата во рерна и печете 30 минути или додека кората од лиснатото тесто не добие убава златножолта боја. Послужете со задушен зеленчук во путер и сезонска салата.
Пријатно!
