За да ги направите овие прекрасни бајадери нема да ви биде потребен миксер, ниту пак треба да ги печете.
Овој прекрасен чоколаден десерт кој подеднакво го сакаат и постарите и помладите можете да го подготвите според оваа едноставна рецепта за само 20 минути.
Потребни состојки:
- 300 гр посни мелени бисквити;
- 200 гр мелени ореви;
- 250 гр шеќер;
- 1 ванилин шеќер;
- 10 лажици вода;
- 200 гр посен маргарин;
- 150 гр посно чоколадо за готвење.
За глазура:
- 200 грама темно чоколадо,
- 3 лажици масло.
Начин на подготовка:
Во шерпата истурете ги шеќерот и ванилиниот шеќер, додадете вода и варете додека не зоврие.
Се трга од оган, па се додава маргаринот и се меша додека не се растопи. Додадете мелени бисквити и мелени ореви и убаво измешајте.
Смесата се дели на два дела, на едниот се додава растопено чоколадо за готвење, а другиот останува жолт. Во правоаголен плех нанесете прво од кафеавиот дел, а потоа од жолтиот дел.
Вака подготвениот колач ставете го во фрижидер да стегне.
За подготовка на глазурата:
Растопете ја чоколадата со масло и прелијте ја врелата глазура врз колачот. Кога колачот ќе се стегне, се сече на правоаголни форми (штангли) и се сервира.
Добар апетит!
