Ако постите или сакате да пробате ново и вкусно јадење без месо, мора да ги пробате овие пиперки! Велигденскиот пост, кој започна и ќе трае до 2 мај, е голем предизвик за многу домаќинки, бидејќи тие не знаат што да подготват за ручек.
Наш предлог се суви пиперки полнети со ореви.
Состојки:
- 10 суви пиперки
- 1 чаша ориз
- 1 праз
- 3 чешниња лук
- 2 моркови
- 1 чаша снегулки од соја
- половина чаша мелени ореви
- 1 лажичка црвен пипер
- 1 лажичка сол
- 1 чаша сок од домати
- малку бибер
Подготовка:
Измијте ги пиперките, па натопете ги во топла вода и оставете ги да стојат некое време. Исецкајте праз и лук, па динстајте ги. Додадете го ренданиот морков, и динстајте уште малку.
Во издинстаниот зеленчук додадете снегулки соја и ориз, сол, бибер и црвен пипер, а потоа истурете две чаши вода и варете на средна топлина уште десет минути. Кога оризот е полуварен, тргнете ја тавата од оган, додадете мелени ореви и наполнете ги пиперките со подготвената смеса.
Наредете ги пиперките на плех за печење, а потоа истурете мешавина од сок од домати и вода во еднакви размери. Печете на 220 степени додека сокот не испари целосно.
Пријатно!