Посната пита со ајвар и печурки воодушевува со вкусот. Моите две омилени состојки, ајварот и печурките.
Состојки:
- 500 гр готови кора
- 100 мл вода
- 100 мл масло
- половина тегла ајвар
- најмалку 500 гр шампињони
- 1 тенок праз
- сол по вкус
Подготовка:
Исецкајте го празот и со малку вода и масло ставете го да се пропржи. Кога веќе ќе омекне, додадете ги исецканите печурки. Така издинстајте ги додека не испари речиси целата вода, ако остане малку ќе ја искористите за премачкување на кората.
Ако ви остане вода од печурки, тогаш речиси и да не ви треба вода за да ја премачкате кората, потопете ја четката во тој сок и подмачкајте ја кората во комбинација со масло.
Земете по три кори. Првата кора попрскајте ја со малку масло, ставете ја втората и премачкајте ја со сок од печурките или вода.
Ставете ја третата, премачкајте ја скоро целата со ајвар. Оставете го крајот да се завитка неподмачкан, да не истече, а потоа ставете ги исечените шампињони со праз по целата должина на кората. Истото направете го и со останатите кори. Се добиваат 4 – 5 ролати во зависност од тоа дали корите се подебели или потенки.
Се пече во загреана рерна на 220 степени додека не порумени. Ако ви останало масло и сок од печурки или вода, слободно премачкајте одозгора, прободете ги со нож и повторно премачкајте. Тој вишок вода ќе испари додека се пече.
Пријатно!
