Ова пециво е многу е вкусно и супер оди наутро со кафе или чај. Може да стои долго.
Состојки:
- 1400 гр брашно
- 1/2 литар млеко
- 1 коцка квасец
- 250 гр шеќер
- 5 јајца
- 1 жолчка од јајце
- 250 мл масло
- 150 гр суво грозје
- 300 гр друго сушено овошје (сливи, смокви, ананас, брусница, кајсии)
- 150 гр ореви (лешници или бадеми)
- кора од 2 поголеми лимони
Подготовка:
Во шолја млако млеко ставете коцка квасец, лажичка шеќер и лажичка брашно и оставете да стаса. Во преостанатото половина литар млако млеко ставете шеќер да се растопи. Во сад за матење (малку поголем бидејќи е големо тестото) ставете брашно, додадете го квасецот, млекото со стопен шеќер, маслиновото масло, јајцата, кората од лимон и сувото грозје. Замесете го тестото со средна тврдост и оставете го добро да нарасне.
Овошјето измијте го и ставете го во вода десетина минути. Процедете ги и оставете ги на страна. Кога тестото ќе нарасне, замесете го. Поделете на 4 топки. Развијте правоаголна кора со должина на плехот за печење.
Корите посипете ги со цели ореви, не мора да се сечкаат со сувото овошје. Овошјето може и малку да го исцедите во тестото. Замотајте ја кората во ролат и така ставете ја на плех. Направете го истото со сите кори.
Во помал сад ставете ја жолчката со 2 лажици вода, лесно измешајте и премачкајте одозгора. Оставете уште малку да нарасне, околу 20 минути, па вклучете ја рерната. Почекајте да се загрее рерната. Се пече во загреана рерна на 250 степени додека малку не порумени, се намалува на 150 степени и се пече уште 40 минути.
Ако мислите дека ќе изгори при тој премин за намалување на температурата бидејќи жолчката е темна, ставете преку хартија 15 минути и потоа отстранете ја. Кога ќе се испече извадете го од тавата, ставете на решетка да се излади. Целосно изладените ролати завиткајте ги во проѕирна леплива фолија и чувајте ги додека да се послужат.
Најдобро е да се послужи следниот ден. Исечете со тенок остар нож на тенки парчиња. Послужете со чај или млеко.
Пријатно!