Освежителен десерт од бисквити и портокали кој не се пече, само треба да почекате да се стврдне.
Зимскиот период секогаш го одбележуваат цитрусните овошја, особено вкусните портокали кои секој секогаш ги има дома. За да го подготвите овој рецепт ќе ви требаат само два портокали, малку бисквит и млеко, а најдобро од се, нема печење и брзо е подготвен за послужување. Сигурно вашите гости ќе побараат парче повеќе, но и рецепт кога ќе ја пробаат оваа освежителна слатка.
Состојки:
- 150 гр бисквит
- 2 портокали
- 500 мл млеко
- 150 гр шеќер
- 1 жолчка од јајце
- 4 лажици пченкарен скроб
- 2 лажици брашно
- 300 мл сок од портокал
- кокос
Подготовка:
Во калап со дијаметар од 26 см наредете ги бисквитите кои претходно сте ги натопиле во млеко. Портокалите со кората исечкајте ги на прстени кои потоа ќе ги преполовите и ќе ги наредите исправени по работ на калапот.
Во сад се прелива млекото, се додава шеќерот, жолчките, две лажици скроб и 2 лажици брашно. Добро измешајте и варете на тивок оган додека не се згусне. Кога филот малку ќе се излади, прелијте го врз бисквитот.
Во сокот од портокал додадете 50 гр шеќер и 2 лажици скроб и варете додека не добиете густа маса која потоа ќе ја прелиете врз филот. Распоредете рамномерно. Оставете го колачот да отстои во фрижидер околу еден час и потоа извадете го калапот. За украсување, одозгора посипете малку кокос.
Пријатно!