Вкусен путер од кикирики кој може да го подготвите во секое време. Цело семејство ќе ужива во овој неодолив вкус…
Путерот од кикирики може да го направите во две варијанти, обичен и чоколаден.
Обичен путер од кикирики
Состојки:
- 250 грама кикирики (непечени и несолени)
Подготовка:
Кикириките распоредете ги во плех за печење и ставете ги во рерна на 50 степени целзиусови. Доволно е да ги загреете околу 30-45 минути (нема потреба да ги печете на висока температура) и ќе го осетите добро познатиот мирис!
Имајте на ум дека кикириките што се продаваат веќе лупени (без тенката кафена лушпа) се до некаде термички обработени, па најдобро е да купите нелупени. По самото „загревање“ оваа тенка лушпа може многу лесно да ја отстраните само со триење на кикириките помеѓу дланките.
Оставете ги да се оладат 5-10 минути и ставете ги во блендер. Почнете со мелење…
По неколку минути смесата ќе почне да се згуснува и ќе стане леплива. Полека продолжете со блендирање.
Уште неколку минути подоцна кикириките ќе почнат да ги ослободуваат своите масла и смесата ќе стане потечна и похомогена. Тогаш може да прекинете со блендирање и да оставите малку покрцкава текстура, или пак да продолжите додека да добиете текстура мазна како путер.
Чоколаден путер од кикирики
Потребни состојки:
- 250 грама кикирики (непечени, несолени)
- 1 лажица какао или рогач
- 5 лажици јаворов сируп (или друг засладувач по желба)
Подготовка:
Процесот на подготовка е ист како и кај обичниот путер од кикирики, само што при крајот на блендирањето се додаваат какаото и засладувачот.
По потреба може да се додаде и околу 50 мл. вода, бидејќи засладувачот ќе ја направи смесата полеплива и погуста.
