Чупавци се обожаваат со џем од јагоди или малина, а одлични се и со додавање на шлаг или сладолед.
Мек бисквит кој мириса на ванила и кокос е специјалитет во Австралија каде го нарекуваат Ламингтон, тој често содржи џем направен од јагоди, малини или некое друго омилено овошје. Одлични се и се служат со сладолед и шлаг. Пред да ги подготвите извадете ги путерот и јајцата на време за да се загреат на собна температура.
Состојки:
- 125 гр путер
- 220 гр шеќер
- 1/2 лажиче екстракт од ванила
- 3 јајца
- 260 гр брашно
- 3,5 лажички прашок за пециво
- 125 мл млеко
- Џем од малина, јагода
Чоколадна глазура:
- 180 гр црно чоколадо
- 200 гр млеко
- 30 гр путер
- 180 гр шеќер во прав
- 20 гр какао во прав
- 4-5 лажици топла вода
- 200 гр кокос
Подготовка:
Загрејте ја рерната на 180 ° С. Поставете плех со хартија за печење. Во сад просејте го брашното и прашокот за пециво. Со умерена брзина, измешајте омекнат путер, ванила и шеќер околу 2 минути, а потоа додавајте по едно јајце, мешајќи по секое додавање. Додадете половина брашно, а потоа половина млеко наизменично и постепено мешајќи и повторете го процесот.
Истурете го тестото во подготвениот плех и печете околу 25 минути. Користете чепкалка за заби за да бидете сигурни дека е печена смесата. Оставете бисквитот да се олади на решетката околу десет минути пред да го отстраните и оставете го да се излади целосно. Исечете ги рабовите на оладениот бисквит со нож и пресечете го на половина хоризонтално. Бисквитот премачкајте го со џем, повторно преклопете го и исечете го на коцки кои ќе ги ставите во фрижидер половина час до еден час за подоцна полесно да ги премачкате со глазура.
За глазурата, стопете ги чоколадото, путерот и топлото млеко, а потоа оставете го садот настрана и промешајте ги шеќерот во прав и какаото. Додадете топла вода на самиот крај.
Ставете го кокосот на голема длабока чинија. Фатете ги колачињата, па натопете ги во глазура и оставете вишокот глазура да се исцеди. Потоа превртете ги во кокос и оставете ги на решетката да се исушат. Ако глазурата стане премногу густа, изматете малку млеко или вода. Оставете ги колачињата да се стегнат околу еден час во фрижидер и послужете.
Добар апетит!
