Се прават без масло, а толку се сочни и меки што се топат во уста. Никој не може да им одолее, а децата едноставно ќе ги обожаваат. Навистина вреди да ги направите.
Потребни состојки:
- 1 коцка свеж квасец,
- 1 лажичка шеќер,
- 1 прстофат сол,
- 1 шака маст,
- 2 жолчки,
- 600 мл млеко,
- 800-900 гр брашно,
- 2 лажици шеќер,
- по желба лимонова кора или малку ракија.
За прелив:
- 500 мл млеко,
- 4 лажици шеќер,
- по желба ванилин шеќер или рум.
Начин на подготовка:
Ставете го квасецот во топло млеко и додајте лажичка шеќер. Добро промешајте додека квасецот да се растопи, па прелијте во садот со пресеано брашно. Оставете го околу 10-тина минути додека да се активира квасецот.
Додајте ги останатите состојки и замесете меко тесто кое не се лепи на рацете. По потреба додајте уште брашно.
Добиеното тесто малку намастете го со масло и оставете го на топло да стаса.
Потоа премесете го тестото, на набрашнета работна површина и развлечете го во кора со дебелина од 2-3 см. Сечете со тркалезен калап за крофни со пречник од 8 см.
Крофните редете ги во тепсија, една до друга. Тепсијата не е потребно да се намастува.
Остатокот од тестото премесете го и повторете ја постапката или ако сте ја пополниле тепсијата можете да направите пита, полнети лепчиња или нешто по ваша желба. Тестото е убаво и погодно за разни печива.
Крофните се оставаат на топло малку да стасаат и да се удвојат. За тоа време загрејте го млекото со шеќерот додека тој да се растопи. За една тепсија потребно е половина литар млеко.
Со топлото млеко се прелеваат сите крофни и малку се протресува тепсијата за да испливаат. Ставете ги да се печат во претходно загреана рерна на 180-200 степени околу 30 минути.
Додека се печат крофните многу нараснуваат.
Се служат топли со една лажица џем, нутела или некој друг сладок крем одозгора. Може да се наросат и со шеќер во прав.
Добар апетит!
