Многу меко, во сочен сос и подготовката е многу едноставна и брза!
Состојки:
- 5 поголеми кременадли (околу 1 кг.)
- 1 кромид
- 5 чешниња лук
- 1 говедска коцка за супа
- половина литар врела вода
- 1 дл бело вино
- сол, бибер
- ловоров лист
- масло
- брашно за панирање
Подготовка:
Извадете ги коските од кременадлата, измијте ги, исушете ги со крпа, исчукајте ги со чекан, додадете сол и бибер. Потоа превртете ги во брашно и пржете ги во масло во тава за да добијат убава, жолта боја. Кога ќе се испржат, ставете ги во огноотпорен сад намачкан со масло, ставете неколку ловорови лисја врз кременадлите.
Во истото масло на кое се пржеле кременадлите, испржете го кромидот исецкан ситно а потоа додадете ситно сецкан лук и 3, 4 лажици брашно. Ситно распарчената коцка за супа промешајте ја во половина литар топла вода и прелијте го кромидот и брашното во тавата, промешајте уште малку да се згусне и додадете малку сол.
Истурете го сосот врз кременадлите од тавата, и за да ги покриете целосно бидејќи тие ќе ја апсорбираат течноста, посипете ги со вино. Покријте го огноотпорниот сад или покријте го со алуминиумска фолија и печете во рерна 45 минути на 180 степени, а потоа отворете го капакот и печете уште десет минути непокриено.
Можете да додадете лажичка слатка и лута мелена пиперка во преливот, ќе биде многу фино и зачинето. Послужете со пире од компири, тестенини, ориз. И секако, салата по ваш избор.
Добар апетит!
