Компири, кромид и сланина, сите печени во рерна, со малку салата и ручекот е готов.
Компирите во оваа комбинација се многу вкусни и сочни бидејќи ги примиле сите вкусови и ароми на кромид и сланина.
Состојки:
- 2 глави кромид – поголеми
- 100 мл масло
- сланина – количина по избор, но подобро би било да ја има повеќе
- 1 лажичка сув зачин
- половина лажичка пиперка
- 4-5 големи компири
- 2 јајца
- 200 – 250 мл јогурт
Подготовка:
Ставете ги компирите со лушпа да се варат во тенџере на шпорет. Варете ги околу 20 минути, додека компирите не се полу сварени.
Исечкајте го кромидот и ставете го во тава да динста, додадете му масло и чаша вода. Кога водата ќе испари, додадете ја сечканата сланина и сè заедно пропржете на средна температура. За сланината да ги ослободи мастите и малку да порумени.
Сварените компири изладете ги во ладна вода и исечете ги на прстени. Намачкајте огноотпорен сад и на дното ставете третина од кромидот и сланината. Разнесете по малку насекаде. Наредете преку тоа половина од компирите и посолете малку.
Повторно една третина од кромид и сланина, компири и одозгора завршувате со кромид и сланина. Вклучете ја рерната на 200 степени да се загрее. Изматете ги јајцата и јогуртот, додадете малку сол и прелијте ги компирите, кромидот и сланината. Печете еден час. Така испечено јадењето, изладете го малку и послужете со салата.
Пријатно!
