Киселите пиперки полнети со зелка се незаменливи при подготовката на зимската храна.
Секој вистински семеен дом не може без подготовка на зимница. Киселите пиперки полнети со зелка се незаменливи на секоја трпеза во зимските денови, а сега е идеално време за нивна подготовка. Свежата зелка можете да ја изрендате претходната вечер, за да испушти што повеќе течност, а пиперките да ги одберете да бидат малку поголеми и да имаат поправилен облик.
Состојки:
- 2 кг пиперка
- 2 глави зелка
- 1,5 литри вода
- 500 мл оцет
- 1 лажица сол
- 1 лажичка шеќер
- бибер во зрно
Подготовка:
Прво изрендајте ја зелката на помали и поситни ленти, посолете ја и оставете да се исцеди вишокот вода. За тоа време, измијте ги пиперките, извадете ги семките, но внимавајте да останат цели. Со раце добро исцедете ја зелката за да се исцеди вишокот вода, а потоа богато наполнете ја секоја пиперка.
Ставете ги пиперките во стаклени тегли, малку поголеми по волумен и добро наполнете ги, за да не лебдат пиперките во теглата кога ќе ја истурите течноста. Во тенџере измешајте вода, оцет, сол и шеќер и варете додека не зоврие. Додека течноста е сè уште топла, внимателно наполнете ја секоја тегла до врвот, додадете неколку зрна бибер и веднаш затворете го капакот.
Загрејте ја рерната на 180 степени, исклучете ја, наредете ги теглите во неа и оставете ја преку ноќ да се излади. На овој начин ќе им овозможите на пиперките без проблем да останат во оставата до зима. Откако ќе ја отворите теглата, чувајте ја во фрижидер.
Пријатно!
Извор: Прашање на вкус
