Во многу рецепти се споменува грчкиот јогурт како додаток, и како главна состојка во јадењето. Иако го има во продавниците еве како сами да го спремите дома.
Главната разлика помеѓу грчкиот и обичниот јогурт е конзистентноста. Грчкиот јогурт е погуст, а обичниот содржи повеќе вода. Грчки јогурт често се користи за подготовка на сосови и може да замени кисела павлака или други млечни производи во рецептите.
Состојки:
- 1 литар полномасно свежо млеко
- 250 мл цврст јогурт или домашно кисело млеко
Подготовка:
Загрејте го млекото скоро до вриење (околу 90С степени), мешајќи за да спречите да не направи пена. Изладете го, исто така мешајќи, на температурата на телото. Одделете една шолја млеко и полека додавајте во јогуртот да се соедини. Истурете ја оваа мешавина во млекото и измешајте се добро. Покријте го садот со топла, влажна крпа и држете го топло од 4 до 8 часа или преку ноќ. Исцедете ја целата маса преку цедалка и оставете течноста да искапе, по можност на ладно место (ако можете, ставете го садот во фрижидер).
Начин 2:
Овој начин е поедноставен односно, за да не мора да поткиселувате млеко можете да користите купен јогурт.
Раширете парче газа или густа хартиена крпа преку сад. Прицврстете го со еластична лента или ластик. Ако треба да исцедите голема количина јогурт, користете две парчиња газа. Сега исипете го јогуртот врз газата и оставете го садот во фрижидер. Оставете јогуртот да се цеди најмалку 3 до 4 часа. Можеби ќе биде потребно подолго време за да се достигне посакуваниот резултат. Откако јогуртот ќе се исцеди, префрлете го во чиста чинија и готов е за употреба. Отфрлете ја течноста која се исцедила од него.
