Тиквички и сирење + крцкава домашна кора се причината зошто нема да можете да одолеете на оваа пита.
Дури и ако не сте искусна домаќинка која може да направи домашна кори, ќе успеете со овој рецепт. Се што треба да направите е добро да го замесите тестото, а потоа се оди глатко.
Состојки:
Тесто:
- 700 гр мазно брашно
- 1 лажичка сол
- 1 лажица масло
- 500-600 мл млака вода
За фил:
- 600 гр сирење
- 3 тиквички (средна големина)
- 2 јајца
- 2 лажици пченкарно брашно
- 2 лажици павлака
- сол
- масло
За обложување:
- 1 жолчка од јајце
- 1 лажица масло
Подготовка:
Во сад ставете брашно, сол, масло и млака вода. Месете го тестото, доколку е потребно додадете малку повеќе вода, но не претерувајте. Тестото треба да биде мазно, за да се истегне кората што е можно подобро. Поделете на 2 дела, ставете на набрашнет плех и намачкајте го тестото. Покријте со фолија. Оставете го да одмори половина час.
Посипете ја со брашно површината на која ќе работите, а потоа земете едно тесто и развлечете го колку што е можно потенко со сукалка. Потоа премачкајте со масло, а потоа префрлете го тестото преку сукалка ако можете, ако не, тогаш истегнете го што е можно потенко со прстите.
Изрендајте ги тиквичките, оставете ги да отстојат 10-15 минути, па исцедете ги од водата добро и посипете ги со пченкарно брашно. Измешајте сирење, јајца и тиквички и додадете павлака, ако сакате.
На растегнатата кора ставете и фил по должината и замотајте ја во ролна. Направете полжав и ставете го во подмачкана тава. Истото го правите и со втората кора, сега не правите полжав, го завиткувате околу првото тесто. Наредете го преостанатиот фил над питата и премачкајте го со жолчка и масло. Печете на 180 ° C околу 25-30 минути.
Добар апетит!
