Гулашот е едно од омилените јадења. За да зготвите фина, густа и ароматична чорба, заедно со добро парче месо, треба да подготвите и соодветна количина кромид, бидејќи тајната на густината на самата чорба е во кромидот.
Покрај тоа што треба да внимавате на количината на кромид, дефинитивно треба да внимавате и на процесот на пржење на кромидот. Кромидот никако не смее да изгори, бидејќи така гулашот ќе добие горчлива нота. Виното дополнително ги нагласува аромите, па можете да користите бело или црвено вино. Покрај аромата, виното ќе влијае и на бојата на чорбата, со црвеното вино ќе постигнете потемна боја.
Иако гулашот е оригинално унгарско традиционално јадење, тој е добро познат и распространет како на нашите простори, така и во соседните земји.
Состојки:
- 500 гр говедско месо
- 500 гр кромид
- 75 гр доматно пире
- 500 мл вода
- 200 мл бело или црвено вино
- 250 гр компири
- половина лажичка ким
- 2-3 ловорови листови
- 2 лажички слатка мелена пиперка
- 50 мл масло
- сол
Подготовка:
Месото се сече на коцки со иста големина и се пржи во подлабока тава на добро загреано масло. Извадете го од тавата и оставете го на страна.
На истото масло пропжете го ситно сечканиот кромид 6-7 минути додека да омекне, па се додаваат месото, кимот и ловоровиот лист и се продолжува со пржење, посипувајќи го месото со малку вода. Гответе на тивок оган околу 90 минути.
Потоа посолете го јадењето, измешајте ја црвената мелена пиперка и концентратот од домати, потоа додадете ги виното и компирите исечкани на коцки и продолжете со варење 30-40 минути додека не се сварат компирите.
Пријатно!
