Соган долма е многу интересно јадење што долго ќе ви остане во сеќавање. Станува збор за традиционално турско јадење, мусака со главици кромид полнети со јунешко месо.
Називот потекнува од турскиот јазик и значи: Полнет кромид, а во некои предели го нарекуваат и кромидарник.
Ова е рецепт за најдобрата сараевска Соган Долма!
Потребни состојки:
- 6 поголеми главици кромид (600 гр.)
- 400 грама мелено јунешко месо
- 150 грама ориз
- масло
- сол
- бибер
- малку босилек
Состојки за запршка:
- 2 лажици брашно
- 2 децилитри сок од домати (доматно пире)
- 1 лажичка мелен црвен пипер
- 400 мл кисела павлака
- сол и бибер
- 50 мл оцет (1/2 филџан)
Начин на подготовка:
Исчистете ги главиците кромид и потсечете ги врвовите на излупените главици кромид. Ставете ги да се сварат во вода, во која сте додале малку оцет. Внимавајте да не ги преварите.
Потоа процедете ги од топлата вода и прелијте ги со ладна. Главиците кромид мора да бидат ладни кога ќе ги раслојувајте.
Исцедете ги главиците кромид од водата и внимателно извадете ги прстените на кромидот од средината, еден по еден за да останат цели, а внатрешноста на кромидот да остане празна за да може да се наполни.
Исечкајте ги извадените прстени и пржете ги на масло, додајте јунешко месо, сол и бибер по вкус, малку босилек, а кога ќе добијат убава боја, додајте го оризот. Прелијте со вода и пржете уште малку, за да омекне оризот. Смесата треба да биде густа, па затоа не претерувајте со водата.
Излупените главици кромид подредете ги во тепсија и наполнете ги со месо. Се полни поединечно секој прстен, се набива смесата со прсти. Не се полни до врв, бидејќи филот од оризот ќе набубри, па постои опасност прстените кромид да испукаат.
Во мало тавче направете запршка. Пропржете го брашното на малку масло, зачинете со мелен црвен пипер, сол и бибер по вкус, па на крајот додајте го пирето од домати. Ако сакате поредок сос, слободно додајте вода.
Кога запршката ќе проврие, додајте ја павлаката и промешајте. Тргнете ја од оган и прелијте ја преку полнетите главици кромид.
Печете ги во загреана фурна на 200 степени околу 30 минути.
Се сервира со кисело млеко како прилог.
