Овие превкусни хамбург лепчиња слободно може да ги користите како замена за леб со било кој оброк, или кога ќе решите да направите вистински американски бургери.
Потребни состојки:
- 2,5 лажички сув квасец
- 4,5 шолји брашно
- 1,5 лажичка сол,
- 2 лажици шеќер
- 75 гр. стопен путер (топено масло)
- половина шолја млеко
- 1 шолја млака вода
За премачкување:
- 1 јајце
- 1 лажица вода
- сусам
Начин на подготовка:
Во сад сипете млака вода, шеќер и квасец. Оставете да надојде квасецот. Во поголем длабок сад истурете ја потребната количина брашно и сол и добро промешајте.
Во надојдениот квасец додадете млако млеко и стопениот путер. Измешајте и полека додавајте ја смесата кон брашното. Замесете тесто. Добиеното тесто покријте го со провидна фолија и оставете на топло место да нарасне.
Кога тестото ќе надојде, ставете го на набрашнета рамна површина. Поделете го на 8 еднакви делови. Секој дел направете го во облик на топчиња. Премачкајте ги топчињата со матено јајце и вода. Потоа поросете ги со сусам.
Топчињата ставете ги во плех обложен со хартија за печење.
Печете 15 минути на температура од 200 степени.
Добар апетит!
